Bi’sim’il’llâhi’r-rahmân’r-rahîm
[me fâ 'î lün | me fâ 'î lün | fa 'û lün]
- Bi-ismi' l-Vâhidi' r-Rabbi' r-Rahîmi Ta'âla' llâhu zü' l-menni' l-Kerîmi
- Kadîm ü Kâdir ü Settâr u Mü'min Şehîd ü Mâlik ü Hayy u Müheymin
- 'Azîz ü 'Âlim ü Rahmân u Hallâk Mü'în ü Nâzır u Hallâk u Rezzâk
- Hüve' l-evvel hüve' l-âhir hüve' l-hû Hüve' l-bâtın hüve' z-zâhir hüve' l-hû
- Zihî bâtın ki ne ma'nîde zâhir Zihî evvel ki ol durur hem âhir
- Zihî Sâni' ki sun'ından bulup fer Olur bir nutfe insân katre gevher
- Zihî zâhir ki bâtındur zuhûrı Zihî bâtın ki zâhir sun'ı nûrı
- Delîli 'aklı bu kim bile hâlet Ki istidlâl-i 'akl eyler delâlet
- Eger az ola egerçi mevcûd eger çok Vücûdı gayra tutarsa ta'alluk
- Bu haşyet-ile kim oldukça ma'lûm Ola girânın evinden o ma'lûm
- Çü ma'lûm olısar âhir nihâdı Anuñ dilinde mümkin olur adı
- .......kendüden olursa cûdı Ta'alluk gayra tutmazsa vücûdı
- Aña bârî mahlûkât dirler Vücûdı "vâcib ü bi' z-zât" dirler
- Bu bir kaç emr olur pes kim mülâzım Bu sözden "vâcib ü bi' z-zât"a lâzım
- Biri budur ki 'arş olmaya zâtı 'Arazdan pâk ola olur zât u sıfatı
- 'Araz zîre ta'allukdur çü cisme Düşipdür genc bu cism-i tılısma
- Çü ma'dûm nite cism ola ma'lûm 'Araz elbetde olur böyle ma'dûm
- Gerek hod "vâcib ü bi' z-zât"uñ ayruk Vücûdı gayra tutmaya ta'alluk
- Mu'arrâdur anuñ zâtı 'arazdan Müberrâdur sıfatı her 'arazdan
- İkinci bu ki çün vâhiddür ismi Vücûdınuñ gerek olmaya cismi
- Ki cism eczâsı yine cismi-y-ile Olupdur münkasım kemmiyyet-ile
- Zihî Mâlik ki mülkinde halel yok Zihî Hâkim ki hükminde cedel yok
- Zihî Sâlik k' anuñdur evveliyyet Anuñla bir vücûda yok ma'iyyet
- Ne zâhirdür ki bâtındur zuhûrı Ne bâtındur ki zâhir sun'-ı nûrı
- Ne evveldür ki yokdur ibtidâsı Ne âhirdür ki yokdur intihâsı
- Ne vardur kibriyâsına bidâyet Ne lutfı bahrına hadd u nihâyet
- Mü'essirlik vasıfından eser yok Velî zât-ı habîrinden habar yok
- Bulınur 'acz anuñ-çun ma'rifetde Ki zâtı sırrı vasf olmaz sıfatda
- Çü 'irfânında 'âcizdür her idrâk Anuñ-çun dir denîler "mâ 'arefnâk"
- Görinen san'atından dirligidür Bilinen kudretinden birligidür
- Ne şerh idem ki bulam zâtına reh Ne kim dir-isem andandur münezzeh
- Teterre zâtuhimâ yekûlün Ta'âli şânuhu 'ammâ yüsîrrûn
- 'Ayân kim ister olursa nihân-ver Nihân kim tâlib olursa 'ayân-ver
- Hudâdur var kemâlı kim degüldür Ne kim dirsem hem oldur hem degüldür
- Bu mevcûdâta vâcibdür çü bi' z-zât Vücûdı varlıgını kılur isbât
- Ki içi pür olınca âdemîler Deñizde kendüden gitmez gemiler
- Bu mevcûdât özinden olmaz icâd Ki var her varı dakı kılan irâd
- Gerekdür her eserde bir mü'essir K' ola te'sîr kılmaklıga kâdir
- 'Amel kılmaga pes bir 'âmil gerekdür Belî her fi'le bir fâ'il gerekdür
- Ne nakş ola k' anuñ mânisi yokdur Binâ hiç var mı kim bânîsi yokdur
- Belî rûşen durur bu şems-i hâver Degüldür kendü kendüden münevver
- Bu kutb-ı sâkin ü bu necm-i seyyâr Bu sahn-ı kâyim ü bu çarh-ı devvâr
- Bu turan yirler ü dönen felekler Bu cinn ü ins ü şeytân u melekler
- Bu 'arş u ferş ü bu meydân-ı 'âlî Ayuñ geh bedri vü gâhî hilâli
- Kadîm olmadugı bu kârubâruñ Bekâsı olmadugı rûzigâruñ
- Bu cerr-i âsumân u sahn-ı gabrâ Ki olmış biri pest ü biri bâlâ
- Bu dörd erkân-ıla bu altı şeh-reh Bu tokuz hakkı-y-ıla yidi hem-reh
- Bu kış u yaz u bu şâm u seherler Mü'essir varlıgındandur eserler
- Emîri var belî bu tahtgâhuñ Bu kamu sun'ıdur şol pâdişâhuñ
- K' anuñ emri-y-iledür çarh -ı dâyim Anuñ hükmi-ledür yir böyle kâyim
- Hamîr-i Âdem iden kilden oldur Mesîh-i Meryem iden yilden oldur
- Düriden hâk u hûndan âdemî ol Yaradan kâf u nûndan 'âlemi ol
- Yedini Mûsinüñ beyzâ kılan ol 'Asâsın elde ejderhâ kılan ol
- Günehsüz oda atdurur Halîlin Viribir tutmag-ıçun Cebraîlin
- Yirini yanar-iken gülşen eyler 'İnâyet nûrı-y-ıla rûşen eyler
- Nişânı kudretidür Yûsuf-ı Ya'kûb Beyân-ı hikmetidür hüzn-i Ya'kûb
- Ta'accüb eyle gör kıyılan 'acîbin K' ider meshûr kendüzinüñ habîbin
- Bitürür serve dârû kim alur hûş Düzer nîş-ile şehri şekkerin nûş
- Dikenden gül kamışdan şekker eyler Sadefden dürr ü taşdan gevher eyler
- Semâyı ki kılur yir bigi pür-jeng Ki ider sahn-ı gabrâyı semâ-reng
- Bahâr-ıla bezer geh gül-sitânı Hazân-ıla bozar gâhî cihânı
- Çü lutfından irişe 'âleme fer Cihân cennet olur çün havz-ı kevser
- Kaçan kim sun'ı virür kuvvete kut Bitürür taşda la'l agacda yâkût
- Güli ki tâze vü rengîn-ter eyler Bozar geh nüshasını ebter eyler
- Çü hâkimdür kamu hikmet anuñdur Kadîr oldur ki her kudret anuñdur
- Ne hikmetdür ki bürhânı belürmez Ne deryâdur ki pâyânı belürmez
- Ne kudretdür bu kim hikmet nedür Ne hikmetdür bu kim san'at nedür
- Bu kamu yok olıcak var oludur Her işde fâ'il-i muhtâr oludur
- Gören "'aynü' l-yakîn " bu mâcerâyı Ne cân-ıla diye çün ü çirâyı
- Ne var peydâsa sun'ı 'ilmi sırdur Sıfatı gerçi biñdür zâtı birdür
- Kamu sîmurglar irmez bu sırra Komaz bol gayreti tevhîd-i gayra
- Yog-ısa kıl nazar gözgüñde ger pâs Ki sen hû dirsen ol dir "eyyühe' n-nâs"
- 'Acâyib güft ü gûdur hây u hûdur K' iki 'âlem o bir hûdan toludur
- Ta'addüd 'âlem-i kesretdedür pes Bu vahdetde ikiligüñ sözin kes
- Bu bâbuñ kim ki "fethu' llâh" fazlın Bilür bir niçe biñ a'dâduñ aslın
- Çü biñlik yüzlik olmaz ola takdîr Arada nesne kalmaz ille kim bir
- Tapulan bir ikidür gerçi mihrâb Pür olmış bir deñizden niçe biñ tâb
- Güneşden câma tokundukça pertev Düşer çün 'aksi reng-â-reng olur ev
- Ki her bir sırçada bir dürlüdür reng Görinür bir ziyâda niçe biñ reng
- Ne yüzdür gör ki görmez anı gözler Anuñdur niçe biñlü niçe yüzler
- Derûn-ı cân u bîrûn-ı cihândur Ne peydâdur ki her gözden nihândur
- Göz anı gözler ü görmez ne gözler Dil anı söyler ü bilmez ne söyler
- Egerçi yolda turmış gösterür yol Velî bilinmez ol kim kandadur ol
- Nihândur zâtı peyzâdur kemâli Ta'âlâ' llâh zihî nûrı ta'âli
- Hamuş olmış durur gûyâlıgından Nihân olmış durur peyzâlıgından
- Habar penhânlıgından hazretidür Eser peydâlıgından san'atıdur
- Kalupdur rûh-ı kuds emrinde hayrân Olupdur 'akl-ı kül 'ilminde nâdân
- Sıfatı bî-çü gûne zâtı bî-çûn Kemâlı bî-kem ü ef'âlı mevzûn
- Mu'arrâdur bu cân zikr itdüginden Müberrâdur göñül fikr itdüginden
- Arı zikr itdüginden her cehûlüñ Biri fikr itdügünden her 'ukûlüñ
- Münezzeh zâtı bâkîsi fenâdur Mu'allâdur "'ale' l-'arş istivâ" dan
- Egerçi şeş cihetde râh olupdur Dü 'âlem "semme vechu' llâh" olupdur
- Cemî'i halk aña kılursa tâ'at Çü yokdur eksigü olmaz riyâdat
- İki 'âlem tolarsa küfrdür hem Kemâlından kim olmaz zerrece hem
- Kamudan lâ-büd isti'lâsı vardur Anuñ-çun şöyle istignâsı vardur
- Yaratmaklıkda çün kim yâri yokdur Katında lâ-cerem mikdârı yokdur
- Bu istignâ ile gör ol Hudâvend Ki yokdur birligine misl ü mânend
- Girü yâd eylemez himmetleründen Pür eyler 'âlemi ni'metlerinden
- Dilerseñ itmeye ni'metlerin kem Hümâmî şâkir ol "v'allâhu a'lem"
- Dilüñ tut aç gözüñi diñle gûşi ol Ki ya'nî 'aczüñi bilüp hamûş ol
~